Лекцыя «Аркадзь Падліпскі. Прэзентацыя кнігі «Улица Ленина, 52/13»»

Details

Створана 11.06.2024 08:30

Бясплатныя курсы «Віцебск: рэальная і папулярная гісторыя роднага горада». Лекцыя 8 (66)

6 чэрвеня ў бібліятэцы адбыліся чарговыя заняткі бясплатных курсаў «Віцебск: рэальная і папулярная гісторыя роднага горада».

Сваю новую, пятнаццатую, кнігу з серыі «Биография витебского дома» «Улица Ленина, 52/13» прадставіў краязнаўца Аркадзь Падліпскі. За выданне кніжнай серыі «Биография витебского дома» Аркадзь Падліпскі стаў лаўрэатам Літаратурнай прэміі імя Петруся Броўкі Віцебскага аблвыканкама за 2017 год. Аркадзь Міхайлавіч расказаў пра гісторыю стварэння кніжнай серыі, пра першыя з выпускаў. Толькі адзін з выпускаў прысвечаны пасляваеннаму дому – «Улица Суворова, 23» (выпуск XIII), дзе жыў Аляксандр Ільінскі. Два выпускі – пра даваенныя будынкі «Улица Доватора 14/9» (выпуск II») і «Дома коммунального типа» (выпуск X). Усе астатнія кнігі прысвечаны дарэвалюцыйным пабудовам.

У новай кнізе «Улица Ленина, 52/13» расказваецца пра будынак, у якім зараз знаходзіцца паштовае аддзяленне № 26. Аркадзь Падліпскі расказаў пра знакамітых людзей, лёс якіх быў звязаны з гэтым месцам: пра украінскага фалькларыста, пісьменніка, літаратурнага крытыка Івана Якаўлевіча Рудчанку (псеўданім Іван Білык), Уладзіміра Казіміравіча Стукаліча, Уладзіміра Аляксеевіча Плюшчэўскага-Плюшчыка. Шмат даведаліся слухачы курсаў і пра гісторыю сувязі ў Віцебску. На лекцыі прысутнічаў таксама ўнук ветэрана абласнога ўпраўлення сувязі Дона Навумавіча Лермана Аляксей Макулін.