Правілы карыстання бібліятэкай

Details

Створана 31.03.2011 09:06

ГЛАВА 1

АГУЛЬНЫЯ ПАЛАЖЭННІ

1. Правілы карыстання дзяржаўнай установай «Віцебская абласная бібліятэка імя У.І.Леніна» (далей – Правілы) распрацаваны ў адпаведнасці з заканадаўствам Рэспублікі Беларусь, Статутам дзяржаўнай установы «Віцебская абласная бібліятэка імя У.І.Леніна (далей – Бібліятэка) і рэгламентуюць узаемаадносіны Бібліятэкі і яе карыстальнікаў у працэсе бібліятэчнага, інфармацыйнага і сацыякультурнага абслугоўвання карыстальнікаў.

2. Віцебская абласная бібліятэка імя У.І.Леніна з'яўляецца галоўнай універсальнай бібліятэкай Віцебскай вобласці, каардынацыйным і метадычным цэнтрам сетак бібліятэк абласнога ўзроўню. Інфармацыйныя рэсурсы Бібліятэкі з'яўляюцца агульнадаступнымі. Абмежаванні па іх выкарыстанні вызначаюцца толькі ў мэтах захаванасці асабліва рэдкіх і каштоўных дакументаў, а таксама ў выпадках, прадугледжаных заканадаўствам.

3. Права карыстання інфармацыйнымі рэсурсамі Бібліятэкі прадастаўляецца юрыдычным асобам, грамадзянам Рэспублікі Беларусь, замежным грамадзянам і асобам без грамадзянства.

4. Бібліятэка забяспечвае бібліятэчнае, інфармацыйнае і даведачна-бібліяграфічнае абслугоўванне карыстальнікаў у чытальных залах, аддзеле абанемента і МБА шляхам віртуальнага абслугоўвання.

5. Бібліятэка забяспечвае сацыякультурнае абслугоўванне карыстальнікаў праз разнастайныя формы работы галерэйна-выставачнага, экскурсійнага і культурна-забаўляльнага напрамкаў.

6. Бібліятэка аказвае карыстальнікам асноўныя паслугі:

 прадастаўленне поўнай інфармацыі пра склад фондаў і інфармацыйныя рэсурсы Бібліятэкі;

 кансультацыйную дапамогу ў пошуку крыніц інфармацыі;

 выдачу дакументаў з фондаў Бібліятэкі для часовага карыстання ў чытальных залах і аддзеле абанемента і МБА;

 выдачу дакументаў або іх копій па міжбібліятэчным абанеменце і электроннай дастаўцы дакументаў;

 прадастаўленне доступу да электронных інфармацыйных рэсурсаў.

Бібліятэка аказвае іншыя віды паслуг, у тым ліку платныя.

ГЛАВА 2

ПАРАДАК РЭГІСТРАЦЫІ КАРЫСТАЛЬНІКАЎ

7. Права карыстацца інфармацыйнымі рэсурсамі Бібліятэкі забяспечвае чытацкі білет, які выдаецца пры рэгістрацыі ў Бібліятэцы.

8. Для рэгістрацыі ў якасці карыстальніка Бібліятэкі грамадзяніну неабходна прад'явіць дакумент, які сведчыць асобу: пашпарт, від на жыхарства ў Рэспубліцы Беларусь, пасведчанне бежанца, фатаграфію памерам 3х4 см і паведаміць неабходныя для рэгістрацыі звесткі.

9. Дзеці і падлеткі ва ўзросце да 14 гадоў пры рэгістрацыі прад'яўляюць пасведчанне аб нараджэнні або пашпарт, а таксама пашпарт аднаго з бацькоў (апекуноў) або дакумент ад работнікаў дзіцячых устаноў (інтэрнатаў, школ).

10. Пры афармленні часовага білета чытача дазваляецца падаваць любы дакумент, які пацвярджае асобу. Часовы білет чытача выдаецца не больш за 5 разоў на працягу года.

11. Чытацкі білет выдаецца за плату. Льготы па аплаце чытацкага білета не прадугледжаныя. У выпадку страты, пры наяўнасці механічных пашкоджанняў (выгібаў, заломаў, драпін і інш.), пры змене прозвішча, імя, імя па бацьку карыстальніка выдаецца новы чытацкі білет за плату на агульных умовах.

Білет чытача аддзела дзіцячай літаратуры для дзяцей і падлеткаў ва ўзросце да 14 гадоў выдаецца бясплатна.

12. Карыстальнік павінен азнаёміцца з дадзенымі Правіламі і засведчыць згоду па іх выкананні асабістым подпісам.

13. Рэгістрацыя калектыўных карыстальнікаў (юрыдычных асоб) ажыццяўляецца на падставе дагавора, які вызначае парадак прадстаўлення інфармацыйна-бібліятэчных паслуг.

ГЛАВА 3

АРГАНІЗАЦЫЯ АБСЛУГОЎВАННЯ КАРЫСТАЛЬНІКАЎ

14. Карыстальнінку даецца магчымасць звяртацца ў Бібліятэку як шляхам непасрэднага наведвання, так і ў рэжыме аддаленага доступу.

15. Для карыстальнікаў, якія непасрэдна наведваюць Бібліятэку, функцыянуе сістэма чытальных залаў, што дыферэнцыруюцца па ўзроўні адукацыі і прафесійнай дзейнасці карыстальнікаў, галінах ведаў і відах дакументаў.

16. Кожнаму карыстальніку пры рэгістрацыі рэкамендуецца адпаведная чытальная зала.

17. Дзеці і падлеткі да 14 гадоў абслугоўваюцца ў аддзеле дзіцячай і юнацкай літаратуры. У выключных выпадках – у іншых аддзелах абслугоўвання на падставе заявы аднаго з бацькоў (апекуноў) ці пісьмовага звароту з месца вучобы, аформленага на фірменным бланку ўстановы адукацыі, з абавязковым абгрунтаваннем неабходнасці карыстання іншымі аддзеламі абслугоўвання Бібліятэкі.

18. Выдача дакументаў з фонду аддзела абанемента і МБА ажыццяўляецца карыстальнікам бібліятэкі з рэгістрацыяй (прапіскай) у г. Віцебску ў колькасці не больш за пяць выданняў тэрмінам на 30 дзён. На дакументы павышанага попыту тэрмін выдачы можа быць скарочаны да 14 дзён. Карыстальнікі маюць права падоўжыць тэрмін карыстання выданнем пры ўмове яго прадастаўлення і адсутнасці запытаў на яго з боку іншых карыстальнікаў.

19. Абслугоўванне карыстальнікаў ажыццяўляецца ў адпаведнасці з дадзенымі Правіламі і іншымі лакальнымі нарматыўнымі актамі Бібліятэкі, якія ўдакладняюць узаемаадносіны Бібліятэкі і карыстальнікаў.

20. Дакументы, заказаныя карыстальнікам з аддзела захоўвання асноўнага фонду, выдаюцца ў чытальную залу адпаведнага профілю.

21. Пры адсутнасці неабходнага дакумента ў фондах Бібліятэкі карыстальнік мае права аформіць заказ на яго атрыманне з іншых бібліятэк праз міжбібліятэчны абанемент.

22. Выдача дакументаў і прадастаўленне платных паслуг спыняецца за 15 хвілін да закрыцця Бібліятэкі.

23. Бібліятэка абслугоўвае карыстальнікаў у наступным рэжыме:

 панядзелак – чацвер: з 10.00 да 21.00;

 субота, нядзеля: з 10.00 да 18.00;

 пятніца: выхадны дзень.

Напярэдадні дзяржаўных святаў Бібліятэка зачыняецца на адну гадзіну раней.

Па асобным графіку працуе служба міжбібліятэчнага абанемента.

24. Бібліятэка не працуе ў дні дзяржаўных святаў і санітарныя дні (першая серада месяца).

25. У выключных выпадках (пры правядзенні мерапрыемстваў дзяржаўнага ўзроўню, тэхналагічных збоях комплексу інфармацыйна-тэхналагічных сістэм) Бібліятэка мае права ўносіць змены ў рэжым работы. Інфармаванне карыстальнікаў аб зменах ажыццяўляецца загадзя праз сайт і інфармацыйныя стэнды Бібліятэкі.

26. Віртуальнае абслугоўванне карыстальнікаў ажыццяўляецца праз сайт Бібліятэкі (http://vlib.by).

ГЛАВА 4

ПРАВЫ КАРЫСТАЛЬНІКАЎ

27. Карыстальнікі Бібліятэкі маюць права:

 наведваць Бібліятэку ў адпаведнасці з рэжымам яе работы;

 атрымліваць у часовае карыстанне дакументы з фондаў Бібліятэкі;

 атрымліваць поўную інфармацыю пра дакументы з фондаў Бібліятэкі праз сістэму каталогаў, картатэк, баз даных і іншых формаў бібліятэчнага інфармавання;

 атрымліваць кансультацыйную дапамогу па пошуку крыніц інфармацыі і заказе дакументаў;

 атрымліваць доступ да нацыянальных і сусветных баз даных, інфармацыйных рэсурсаў Інтэрнэту;

 атрымліваць дакументы або іх копіі па міжбібліятэчнаму абанементу;

 браніраваць дакументы на пэўны час і працягваць тэрмін карыстання дакументам пры адсутнасці запытаў з боку іншых карыстальнікаў на дадзены момант;

 выкарыстоўваць у Бібліятэцы асабістыя тэхнічныя сродкі на аўтаномным сілкаванні без гукавых сігналаў за выключэннем капіравальных прыбораў (сканераў, аўдыё-, фота- і відэаапаратуры), мабільных тэлефонаў і іншых тэхнічных сродкаў у мэтах фота- і відэаздымкі дакументаў з бібліятэчных фондаў і інфармацыі з экранаў манітораў;

 праносіць у Бібліятэку музычныя інструменты ў футлярах;

 наведваць мерапрыемствы і заняткі, якія праводзяцца для карыстальнікаў у Бібліятэцы;

 атрымліваць іншыя віды паслуг, у тым ліку платныя, пералік якіх вызначаны Бібліятэкай і зацверджаны згодна з заканадаўствам Рэспублікі Беларусь;

 звяртацца да кіраўніцтва Бібліятэкі з прапановамі, заўвагамі, скаргамі па пытаннях, звязаных з абслугоўваннем карыстальнікаў.

ГЛАВА 5

АБАВЯЗКІ КАРЫСТАЛЬНІКАЎ

28. Карыстальнікі Бібліятэкі абавязаны:

 выконваць дадзеныя, іншыя лакальныя нарматыўныя акты Бібліятэкі;

 прытрымлівацца рэжыму работы Бібліятэкі;

 праходзіць перарэгістрацыю адзін раз у год у адпаведнасці з усталяваным Бібліятэкай парадкам. Карыстальнікі, якія не прайшлі перарэгістрацыю, Бібліятэкай не абслугоўваюцца;

 своечасова паведамляць супрацоўнікам аддзела рэгістрацыі чытачоў пра змяненні пашпартных дадзеных, страты або крадзяжы білета чытача, часовага білета чытача;

 вяртаць часовы білет чытача ў аддзел рэгістрацыі чытачоў;

 здаваць у гардэроб верхнее адзенне, галаўныя ўборы;

 пакідаць у камеры захоўвання парасоны, сумкі, партфелі і іншыя рэчы памерам больш 30х30х20 см;

 прад'яўляць для прагляду ў аддзеле рэгістрацыі чытачоў сумкі, сшыткі, пакеты, футляры з-пад музычных інструментаў і іншыя рэчы, дазволеныя да уносу ў бібліятэку;

 папярэджваць работнікаў аддзела рэгістрацыі чытачоў аб унесеных у Бібліятэку асабістых друкаваных матэрыялах (кнігах, часопісах, газетах, вучэбна-метадычных матэрыялах, выяўленчых дакументах, нотах і іншых дакументах);

 беражліва адносіцца да атрыманых у карыстанне дакументаў і маёмасці Бібліятэкі;

 паведамляць бібліятэкару пра выяўленне пашкоджанняў у дакуменце;

 захоўваць цішыню, парадак, чысціню ў памяшканнях Бібліятэкі;

 ветліва адносіцца да супрацоўнікаў і наведвальнікаў Бібліятэкі;

 у надзвычайных сітуацыях (пажар, аварыя, пагроза тэрарыстычнага акта і інш.) выконваць патрабаванні супрацоўнікаў Бібліятэкі, органаў унутраных спраў, органаў і падраздзяленняў па надзвычайных сітуацыях.

29. Карыстальнікам Бібліятэкі забараняецца:

 перадаваць чытацкі білет іншым асобам і карыстацца чытацкімі білетамі іншых асоб;

 выносіць дакументы з чытальных залаў, а таксама атрыманыя па МБА за межы Бібліятэкі;

 выносіць дакументы ў іншыя структурныя падраздзяленні без дазволу супрацоўніка Бібліятэкі;

 уносіць у Бібліятэку колючыя і рэжучыя прадметы;

 праходзіць у Бібліятэку ў неахайным знешнім выглядзе;

 наведваць Бібліятэку ў нецвярозым стане, пад уздзеяннем наркатычных, псіхатропных, таксічных сродкаў;

 ўваходзіць у Бібліятэку з жывёламі, за выключэннем карыстальнікаў са слабым зрокам і пазбаўленых зроку ў суправаджэнні сабакі-павадыра;

 ажыццяўляць дзеянні, якія наносяць шкоду дакументу (вырываць ці выразаць старонкі, рабіць паметкі, падкрэсліваць, калькіраваць малюнкі і карты, пісаць на аркушах паперы, пакладзеных на дакумент, і г. д.);

 рабіць паметкі на каталожных картках і вымаць іх з каталожных скрынак;

 браць без дазволу дакументы, атрыманыя іншымі карыстальнікамі;

 прымаць ежу і каляровыя напоі ў падраздзяленнях абслугоўвання;

 выконваць сістэмныя аперацыі ў камп'ютарнай сетцы Бібліятэкі, пераўстанаўліваць праграмныя сродкі, адключаць ад сеткі тэхнічнае абсталяванне, знішчаць і рэдагаваць файлы, створаныя іншымі карыстальнікамі;

 самавольна размяшчаць у памяшканнях Бібліятэкі аб'явы, афішы і іншыя матэрыялы, займацца прадпрымальніцкай, агітацыйнай і рэкламнай дзейнасцю;

 парушаць грамадскі парадак, карыстацца сродкамі мабільнай сувязі ў аддзелах абслугоўвання Бібліятэкі;

 курыць у памяшканнях Бібліятэкі.

ГЛАВА 6

АДКАЗНАСЦЬ КАРЫСТАЛЬНІКАЎ

30. Карыстальнікі Бібліятэкі, якія нанеслі шкоду дакументам або маёмасці Бібліятэкі (камп'ютарам, аргтэхніцы, мэблі, электраабсталяванню і інш.), пакрываюць страту згодна з заканадаўствам Рэспублікі Беларусь.

31. Карыстальнікі, якія парушаюць грамадскі парадак, зневажаюць супрацоўнікаў і карыстальнікаў Бібліятэкі, нясуць адказнасць, згодна Кодэксу Рэспублікі Беларусь аб адміністрацыйных правапарушэннях.

32. За парушэнне гэтых Правіл карыстальнікам ён можа быць часова абмежаваны ў доступе да інфармацыйных рэсурсаў і паслуг Бібліятэкі ці пазбаўлены яго зусім.

ГЛАВА 7

ПРАВЫ І АБАВЯЗКІ БІБЛІЯТЭКІ

33. Бібліятэка мае права:

 уносіць дапаўненні і змяненні ў дадзеныя Правілы ва ўстаноўленым парадку;

 вызначаць умовы выкарыстання бібліятэчных фондаў і іншых інфармацыйных рэсурсаў, а таксама рэжым доступу да іх;

 вызначаць у адпаведнасці з заканадаўствам Рэспублікі Беларусь віды і памеры кампенсацыі шкоды, нанесенай карыстальнікамі;

 вызначаць тэрмін абмежавання доступу да інфармацыйных рэсурсаў і паслуг Бібліятэкі карыстальнікам, якія парушылі гэтыя Правілы.

34. Бібліятэка абавязана:

 фарміраваць інфармацыйныя рэсурсы, забяспечваць іх захаванасць і рацыянальнае выкарыстанне ў адпаведнасці з заканадаўствам Рэспублікі Беларусь у галіне бібліятэчнай справы і Статутам Бібліятэкі;;

 ствараць спрыяльныя ўмовы для работы карыстальнікаў у Бібліятэцы;

 забяспечваць высокую культуру абслугоўвання карыстальнікаў;

 захоўваць канфідэнцыяльнасць звестак пра карыстальнікаў;

 інфармаваць карыстальнікаў пра:

 дапаўненні і змяненні, якія ўносяцца ў гэтыя Правілы;

 змяненні ў рэжыме работы Бібліятэкі;

 віды паслуг, якія выконвае Бібліятэка.