Прэзентацыя кніг Аляксандра Бараноўскага
- Details
- Створана 03.06.2024 12:56
У рамках цыкла «Краязнаўчыя сустрэчы» 30 мая ў бібліятэцы адбылася сустрэча з Аляксандрам Бараноўскім – першым намеснікам дырэктара па навуцы Цэнтра даследаванняў беларускай культуры, мовы і літаратуры Нацыянальнай акадэміі навук Беларусі, кандыдатам гістарычных навук, аўтарам навукова-папулярных выданняў і біяграфічных даведнікаў, прац па гісторыі беларускай дзяржаўнасці, краязнаўстве.
У час сустрэчы прайшла прэзентацыя кнігі «Віцебшчына ў дзяржаўна-тэрытарыяльным уладкаванні Савецкай Беларусі (1919-1924 гг.)» і зборніка «Талачынскі край: гісторыка-культурная спадчына рэгіёна».
Аляксандр Віктаравіч расказаў пра некаторыя з цікавых тэм, асветленых на навукова-практычнай канферэнцыі «Талачынскі край: гісторыка-культурная спадчына рэгіёна», пра ход канферэнцыі і яе ўдзельнікаў.
Асобная ўвага была нададзена нядаўна выдадзенай манаграфіі «Віцебшчына ў дзяржаўна-тэрытарыяльным уладкаванні Савецкай Беларусі (1919-1924 гг.)». Гэта пятая кніга маладога даследчыка і краязнаўцы Аляксандра Бараноўскага. Раней у свет выйшлі кнігі «Полымя (Беліца): гісторыя маёнтка і вёскі» (2015), «Яны нарадзіліся на Сенненшчыне: біяграфічны даведнік» (2016), «Звязаны лёсам з Сенненшчынай: біяграфічны даведнік» (2017), «Дзмітрый Прышчэпаў: старонкі жыцця» (2023).
Словы віншаванняў і пажаданні далейшых поспехаў Аляксандру Віктаравічу ў навуковай і краязнаўчай дзейнасці прагучалі ад дырэктара Інстытута мовазнаўства імя Якуба Коласа НАН Беларусі, кандыдата філалагічных навук, дацэнта Ігара Капылова, галоўнага спецыяліста ўпраўлення культуры Віцебскага аблвыканкама, кандыдата гістарычных навук, дацэнта Дзяніса Юрчака, загадчыка кафедры гісторыі і культурнай спадчыны Віцебскага дзяржаўнага ўніверсітэта імя П. М. Машэрава, кандыдата гістарычных навук, дацэнта Анатоля Дулава, супрацоўніка Інстытута гісторыі НАН Беларусі, археолага, кандыдата гістарычных навук Івана Спірына, педагога, кандыдата гістарычных навук, дацэнта Аляксандра Дзядзінкіна, супрацоўніка Дзяржаўнага архіва Віцебскай вобласці Антона Юпатава.