Ніна Дарафеенка. Фотаальбом удзельнікаў віцебскага падполля

Details

Створана 30.05.2024 10:02

55 гадоў назад, у 1969 годзе, была выдадзена знакавая для нашага горада кніга «Витебское подполье». Гэтае даследванне – даніна вечнай памяці героям патрыятычнага падполля, у ім названа больш за тысячу імёнаў людзей, якія ў гады Вялікай Айчыннай вайны паўсталі на барацьбу з ворагам у акупіраваным Віцебску.

Аўтары кнігі – Ніна Іванаўна і Мікалай Уладзіміравіч Дарафеенкі, Мікалай Ільіч Пахомаў таксама былі ўдзельнікамі Вялікай Айчыннай вайны. У хуткім часе ў выдавецтве «Звязда» пабачыць свет трэцяе выданне кнігі «Витебское подполье».

У аснову кнігі пакладзеныя матэрыялы кандыдацкай дысертацыі «Витебское партийное, патриотическое подполье в годы Великой Отечественной войны (июль 1941 – июнь 1944 г.)» гісторыка Ніны Дарафеенкі, абароненай у 1968 годзе. Дадаткам да дысертацыі быў «Фотоальбом участников витебского подполья», складзены Нінай Іванаўнай. На яго старонках 192 фотаздымкі – гэта кіраўнікі партызанскага і падпольнага руху, падпольных, разведвальных груп, падпольшчыкі, сувязныя, гаспадары явачных кватэр. Ніна Дарафеенка выступала ў навучальных установах, працоўных калектывах з расказамі пра герояў віцебскага падполля і дэманстравала гэты фотаальбом.

Віцебская абласная бібліятэка ўдзячная Валянціне Мікалаеўне Кучарэнка, дачцэ Ніны і Мікалая Дарафеенкаў, якая дала нам матэрыялы фотаальбома для алічбоўкі. На многіх старонках ёсть каментарыі і паметкі, пакінутыя ў ходзе працы з ім Нінай Дарафеенкай, што робіць фотаальбом яшчэ больш каштоўным.

«Фотоальбом участников витебского подполья» размешчаны ў электронным рэсурсе «Вызваленне Віцебшчыны. 1943–1944» у раздзеле «Летапісцы гераічнага мінулага», прысвечаным Ніне і Мікалаю Дарафеенкам.