Абласная выстава-агляд самаробнай кнігі «Кнігу горада гартаючы»

Details

Створана 18.09.2017 13:07

14 верасня ў Віцебскай абласной бібліятэцы падведзены вынікі абласной выставы-агляду самаробнай кнігі «Кнігу горада гартаючы».

Удзельнікамі выставы сталі пераможцы раённых этапаў – бібліятэкары і чытачы, прафесіяналы і аматары выяўленчага і прыкладнога мастацтва, сярод іх – мастакі, майстры Дамоў рамёстваў, навучэнцы і супрацоўнікі навучальных устаноў вобласці.

Аснову экспазіцыі складаюць 68 самаробных кніг рознай тэматыкі (32 індывідуальныя і 36 калектыўных работ), якія выкананы ў разнастайных тэхніках: скрапбукінг, піраграфія, батык, лепка, вышыўка, шыццё, вязанне. Многія работы выраблены з гліны, берасты, кардона, фетра, фанеры і іншых матэрыялаў.

Створаныя кнігі з'яўляюцца шчырым прызнаннем у любові да Беларусі, нацыянальнай культуры і роднай мовы: «Беларусь – мой родны край» (Гарадок), «Вобразы мілыя роднага краю» (Шуміліна), «Сімвалы беларускага арнаменту» (Ушачы) і іншыя. Шэраг работ прысвечаны 135-годдзю з дня нараджэння класікаў літаратуры Я. Купалы і Я. Коласа. Прадстаўлены на выставе і работы, аформленыя на аснове вершаў Н. Гілевіча, Я. Сіпакова, Р. Барадуліна, У. Карызны і іншых беларускіх аўтараў.

Падчас арганізацыі выставы ў рамках Дня беларускага пісьменства ў Полацку цікавасць да работ была асаблівая, і было шмат гасцей і гараджан, хто змог пазнаёміцца з імі, а таксама прыняць удзел у галасаванні на прыз глядацкіх сімпатый. Некаторыя з работ атрымалі прапанову заслужанага дзеяча культуры Рэспублікі Беларусь Зінаіды Камароўскай папоўніць фонды Дзяржаўнага літаратурна-мемарыяльнага музея Якуба Коласа. Аўтары з Бешанковіч, Віцебска і Шуміліна будуць запрошаны ў Мінск падчас урачыстага святкавання юбілейнай даты класіка беларускай літаратуры.

Ва ўрачыстых мерапрыемствах да Дня бібліятэк Беларусі і падвядзенні вынікаў абласной выставы-агляду прынялі ўдзел старшыня Віцебскай абласной арганізацыі Беларускага прафесійнага саюза работнікаў культуры, інфармацыі, спорту і турызму А. Сабірава, старшыня Віцебскага абласнога грамадскага аб'яднання праваслаўных жанчын І. Касцюковіч, кандыдат мастацтвазнаўства, вядучы метадыст аддзела традыцыйнай культуры Віцебскага абласнога метадычнага цэнтра народнай творчасці Л. Вакар.

Па рашэнні журы пераможцамі ў асноўных намінацыях прызнаны наступныя работы:

У намінацыі «За папулярызацыю нацыянальнай літаратуры і культуры» адзначана работа ДУК «Чашніцкая цэнтралізаваная бібліятэчная сістэма» (дырэктар Міцькавец Святлана Васільеўна). Беларускі куфар, які ўключае кнігі «Чашніччына – край таямніц», «Янка Журба. Я рос сярод красы прыроды» і «Янка Журба. Вершы», мае выдатнае майстэрскае афармленне, змяшчае цікавыя факты, мясцовыя легенды і паданні, звесткі гістарычнага характару.

У намінацыі «Лепшае мастацкае афармленне твораў пісьменнікаў і паэтаў Віцебшчыны» адзначана работа, створаная паводле бурлескнай паэмы Канстанціна Вераніцына «Тарас на Парнасе», прадастаўленая Гарадоцкай цэнтральнай раённай бібліятэкай ДУК «Гарадоцкі культурна-асветніцкі цэнтр і сетка публічных бібліятэк» (аўтар – бібліятэкар Галавіна Марына Барысаўна).

У намінацыі «Лепшае мастацкае афармленне кнігі краязнаўчага накірунку» адзначана работа «Дзяўчына-падарожніца», створаная бібліятэкай-філіялам № 14 імя У. Караткевіча ДУ «Цэнтралізаваная бібліятэчная сістэма г. Віцебска» (загадчык Ражноўская Галіна Іванаўна).

У намінацыі «Лепшае мастацкае афармленне твораў дзіцячай літаратуры» адзначана работа «Еўдакія Лось. Вершы» бібліятэкі-філіяла № 19 імя Е. Лось ДУ «Цэнтралізаваная бібліятэчная сістэма г. Віцебска» (загадчык Шашуткіна Ганна Анатольеўна).

У намінацыі «Асветнікі зямлі беларускай» адзначана работа Ноўкінскай сельскай бібліятэкі ДУК «Віцебская раённая цэнтралізаваная бібліятэчная сістэма» (загадчык Канышына Таццяна Сяргееўна).

Па выніках выставы-агляду Гран-пры прысуджана майстру-метадысту ДУК «Полацкі раённы цэнтр рамёстваў і нацыянальных культур» Зяленскай Кацярыне Уладзіміраўне за стварэнне самаробнай кнігі з гліны «Псалтыр».

Акрамя таго, членами журы адзначана 18 работ у спецыяльных намінацыях.

Усе пераможцы атрымалі ў падарунак ад Віцебскай абласнога грамадскага аб'яднання праваслаўных жанчын кнігі рэлігійнага зместу, а 6 работ адзначана спецыяльнымі прызамі. Партнёрамі і спонсарамі, якія таксама падтрымалі ідэю аб правядзенні выставы выступілі Віцебская абласная арганізацыя Беларускага прафесійнага саюза работнікаў культуры, спорту і турызму, упраўленне спорту і турызму Віцебскага аблвыканкама, КПУП «Кандытарская фабрыка "Віцьба"», прадпрыемствы ТДА «Беліта Вітэкс», ТАА «Часпром», магазін бытавой тэхнікі «Вулкан».