Лабараторыя поспеху: ад ідэі да друку!

Details

Створана 21.03.2025 13:38

Мы жывём у свеце, дзе інфармацыя акружае нас паўсюль. Але як яна трапляе да нас у рукі? Колькі працы і тэхналогій стаіць за яе стварэннем?

Вядучае паліграфічнае прадпрыемства Віцебскай вобласці стала ўдзельнікам прафарыентацыйнага праекта «Лабараторыя поспеху: ад ідэі да бізнесу». У абласной бібліятэцы 20 сакавіка адбылася сустрэча старшакласнікаў сярэдняй школы № 11 імя М. М. Бахціна з прафесіяналамі ў сферы паліграфіі. Мерапрыемства прайшло пры ўдзеле прадстаўнікоў Віцебскай абласной друкарні – дырэктара Аляксандра Бародыя і намесніка начальніка вытворчага аддзела Алесі Ралавец.

Традыцыйна работа лабараторыі пачалася з інтэрактыўнай часткі, якая дазволіла праверыць веды школьнікаў па гісторыі кнігадрукавання. Падлеткі даведаліся, як тэхналогіі вырабу кніг і іншых відаў друкаванай прадукцыі змяніліся з цягам часу, і як гэта паўплывала на працэс іх стварэння.

Падчас сустрэчы прадстаўнікі друкарні расказалі пра неабходныя навыкі і веды для работы ў гэтай сферы. Яны падкрэслілі важнасць тэхнічнай пісьменнасці, крэатыўнага мыслення і ўмення працаваць у камандзе. Таксама абмяркоўваліся перспектывы кар'ернага росту, якія адкрываюцца перад маладымі спецыялістамі ў паліграфічнай галіне.

Аляксандр Бародый у сваім выступленні адзначыў, што прадпрыемства зацікаўлена ў кваліфікаваных спецыялістах. З гэтага года друкарня пачынае прадастаўляць мэтавае накіраванне на навучанне, што адкрывае новыя магчымасці для моладзі, якая жадае звязаць сваю кар'еру з паліграфіяй.

У рамках мерапрыемства супрацоўнікі агульнай чытальнай залы прадэманстравалі выставу кніг з фонду бібліятэкі, надрукаваных у рэгіянальнай тыпаграфіі. Экспазіцыя стала важным дадаткам да сустрэчы, дазваляючы школьнікам не толькі пачуць пра прафесіі ў паліграфіі, але і ўбачыць вынік іх працы. Кожная кніга – гэта не проста набор старонак, а вынік каманднай працы. Алеся Ралавец звярнула ўвагу на ўнікальныя выданні, якія з'яўляюцца гонарам тыпаграфііі. Школьнікі даведаліся пра працэс іх стварэння, пачынаючы ад распрацоўкі дызайну і заканчваючы друкаваннем тыражу. З асаблівым хваляваннем супрацоўнікі друкарні падзяліліся радаснай навіной: у 2025 годзе прадпрыемства адзначыць 105-годдзе. Да гэтай даты рыхтуецца ўнікальная кніга, прысвечаная гісторыі абласной друкарні.

Сустрэча натхніла школьнікаў задумацца пра магчымасць звязаць свой лёс з вялікай дружнай камандай Віцебскай абласной друкарні, дэвіз якой гучыць: «Мы любім тое, што друкуем!»