Прэзентацыя публікацый пра Віцебск у часопісе «Край Смоленский»

Details

Створана 18.03.2025 13:31

17 сакавіка ў бібліятэцы ў рамках цыкла «Краязнаўчыя сустрэчы» адбылася прэзентацыя публікацый пра Віцебск у часопісе «Край Смоленский».

У прэзентацыі выдання прыняў удзел галоўны рэдактар навукова-папулярнага часопіса «Край Смоленский» Юрый Шорын. Юрый Мікалаевіч расказаў пра гісторыю аднаго з галоўных краязнаўчых перыядычных выданняў Смаленшчыны, якое вось ужо трыццаць пяць год штомесяц прадстаўляе на сваіх старонках цікавыя, змястоўныя матэрыялы па гісторыі, археалогіі, этнаграфіі, мастацтве, краязнаўстве рэгіёна. Сярод гэтых публікацый таксама ёсць прысвечаныя нашай агульнай гісторыі, людзям, што аб'ядноўваюць Віцебшчыну і Смаленшчыну.

Адна з такіх публікацый – артыкул Максіма Макарава і Людмілы Хмяльніцкай «Витебской ратуше – 250». У часопісе апублікаваны новыя дакументы па гісторыі ўзвядзення будынку ратушы. Людміла Хмяльніцкая падкрэсліла ў сваім выступленні, што 16 сакавіка Віцебск адзначае юбілей гарадской ратушы, а 17 сакавіка 1597 года гораду было дадзена магдэбургскае права.

Артыкул Таццяны Катовіч і Дар'і Івановай прысвечаны аднаму са знакамітых творцаў авангарднага мастацтва Эль Лісіцкаму, чыё жыццё і творчасць таксама аб'ядноўваюць Віцебск і Смаленск. Доктар мастацтвазнаўства, прафесар Таццяна Катовіч расказала, што папярэднічала з'яўленню гэтага матэрыялу ў выданні.

У падарунак бібліятэцы Юрый Шорын перадаў кнігі, выдадзеныя ў серыі «Библиотека журнала "Край Смоленский"» і асобнікі часопіса.