Адкрыццё персанальнай выставы Аксаны Зорынай «Дрэва жыцця»

Details

Створана 06.09.2024 10:20

Персанальная выстава выцінанкі «Дрэва жыцця» Аксаны Зорынай, члена Беларускага саюза майстроў народнай творчасці, адкрылася 5 верасня ў галерэі 1-га паверха абласной бібліятэкі.

Аксана Анатольеўна нарадзілася і вырасла ў г. Віцебску. У 2004 годзе з чырвоным дыпломам скончыла факультэт дэкаратыўна-прыкладнога мастацтва Віцебскага дзяржаўнага вучылішча мастацтваў, а ў 2009 годзе стала выпускніцай факультэта выяўленчага мастацтва Віцебскага дзяржаўнага ўніверсітэта імя П. М. Машэрава. Асноўным напрамкам творчасці выбрала выцінанку, маляванку і набойку.

Выцінанка – адзін з найстаражытных відаў дэкаратыўна-прыкладнога мастацтва, які ўзнік у Кітаі і з часам распаўсюдзіўся па ўсім свеце. На кожным кантыненце гэты від мастацтва мае свае характэрныя адметныя рысы, і сучасная беларуская выцінанка таксама арыентуецца на нацыянальныя матывы, вядомыя вобразы і народныя традыцыі.

Усё гэта адлюстравана ў творчасці Аксаны Зорынай, якая ўжо больш за дзесяць гадоў займаецца вырабам выцінанак. На адкрыцці выставы майстар народных промыслаў (рамёстваў) Культурна-гістарычнага комплексу «Залатое кальцо горада Віцебска "Дзвіна"» падзялілася з гасцямі расповедам пра свой творчы шлях, які не толькі захапіў яе ў чароўны свет выцінанкі, але і выклікаў цікавасць да творчай спадчыны нашага народа.

Дарэчы, мастацтва беларускай выцінанкі ў 2021 годзе атрымала статус нематэрыяльнай культурнай спадчыны і ўключана ў спіс гісторыка-культурных каштоўнасцей Беларусі.

Выстава адкрыта да 31 кастрычніка.