Літаратурна-музычная вечарына «І сёння з намі Колас і Купала»

Details

Створана 08.11.2022 10:53

3 лістапада, у дзень 140-годдзя з дня нараджэння народнага паэта Беларусі Якуба Коласа ў бібліятэцы адбылася літаратурна-музычная вечарына «І сёння з намі Колас і Купала».

Нездарма ў гэты дзень узгадваліся імёны двух народных паэтаў Беларусі Якуба Коласа і Янкі Купалы: унёсак іх у беларускую літаратуру, у развіццё беларускай мовы, беларускай культуры неацэнны, творчае і асабістае сяброўства песняроў беларускай літаратуры працягвалася амаль чатыры дзесяцігоддзі. Пра гэта сказалі ў сваіх выступленнях старшыня Віцебскага абласнога аддзялення ГА «Саюз пісьменнікаў Беларусі» Тамара Краснова-Гусачэнка і вядучы вечарыны, загадчык аддзела краязнаўства Ларыса Рагачова.

Літаратуразнаўцы адзначаюць, што ў паэме Якуба Коласа «Новая зямля» кожны можа знайсці тое, што адпавядае ягоным запатрабаванням i густу: адзiн – зямную фiласофiю, другi – рыбалку i паляванне, трэцi – успамiны пра дзяцiнства... Напэўна таму менавіта радкі з гэтай паэмы ўзгадваліся ўдзельнікамі вечарыны часцей за ўсё. Урывак з паэмы Якуба Коласа «Новая зямля» прачула прачытала паэтэса Іна Саламаха. А яскравае выступленне вядучага майстра сцэны Нацыянальнага акадэмічнага драматычнага тэатра імя Якуба Коласа Юрася Цвіркі не пакінула абыякавымі нікога з прысутных.

Слова пра народных песняроў Янку Купалу і Якуба Коласа сказала паэтэса Галіна Загурская. Загадчык Музея гісторыі прыватнага калекцыянавання Васіль Паўлючкоў запрасіў удзельнікаў вечарыны пазнаёміцца з выставачным праектам «Незабыўны вобраз песняра», прымеркаваным да 140-годдзя з дня нараджэння Якуба Коласа, са збору Дзяржаўнага літаратурна-мемарыяльнага музея Якуба Коласа.

Вечарына была аздоблена песнямі ў выкананні народнага камернага хору ДУ «Цэнтр культуры Віцебск» пад кіраўніцтвам Таццяны Жукавай і кіраўніка ансамбля народнай музыкі «Жалейка» УК «Залатое кальцо г. Віцебска «Дзвіна» Анастасіі Карабанавай.