XXII Рэспубліканскія Свята-Еўфрасіннеўскія педагагічныя чытанні

Details

Створана 27.11.2024 10:28

Абласны этап XXII Рэспубліканскіх Свята-Еўфрасіннеўскіх педагагічных чытанняў на тэму «Роля праваслаўнай кнігі ў духоўна-маральным і патрыятычным выхаванні» адбыўся 22 лістапада ў Віцебскім абласным інстытуце развіцця адукацыі.

Арганізатарамі мерапрыемства выступілі галоўнае ўпраўленне па адукацыі Віцебскага абласнога выканаўчага камітэта, Віцебская епархія Беларускай Праваслаўнай Царквы і Віцебскі абласны інстытут развіцця адукацыі. Сярод удзельнікаў былі педагогі, прадстаўнікі навуковай супольнасці, спецыялісты, якія працуюць з дзецьмі і моладдзю, а таксама святары.

Віцебская абласная бібліятэка імя У. І. Леніна прыняла ўдзел у чытаннях, прадстаўляючы вопыт супрацоўніцтва з Віцебскай епархіяй у рамках праграмы «Жывое слова мудрасці духоўнай». Загадчыца агульнай чытальнай залы Таццяна Патоцкая прадставіла даклад «Праваслаўе і культура: рэсурсы бібліятэкі для духоўнай асветы». Дзейнасць духоўна-асветніцкага цэнтра, праекты выставачнай залы «ExLibris», разнастайныя па форме і зместу інфармацыйна-асветніцкія мерапрыемствы, батлеечныя прадстаўленні – гэта работа бібліятэкі накіравана на фарміраванне духоўна-маральнай свядомасці чытачоў. Асаблівая ўвага была нададзена мультымедыйнаму праекту «Святыя заступнікі Віцебшчыны», які стаў лепшым культурным праектам патрыятычнай тэматыкі па рашэнню Міністэрства культуры Рэспублікі Беларусь па выніках 2023 года.

Цікавасць да абласнога этапу XXII Рэспубліканскіх Свята-Ефрасіннеўскіх педагагічных чытанняў была высокая: мерапрыемства прайшло ў афлайн- і анлайн-фарматах, прадэманстраваўшы актыўнае ўключэнне больш як 300 удзельнікаў з усёй Віцебскай вобласці. У рабоце секцый абмяркоўваліся пытанні, прысвечаныя значэнню кніг для духоўнай спадчыны, фарміраванню асобы і патрыятычнаму выхаванню.