Літаратурныя масты: Віцебская абласная бібліятэка і Россупрацоўніцтва пачынаюць сумесную працу

Details

Створана 27.11.2024 10:19

Круглы стол «Літаратурныя масты» з удзелам беларускіх і расійскіх пісьменнікаў і паэтаў адбыўся 26 лістапада ў абласной бібліятэцы.

Сустрэча пачалася з вітальнага слова галоўнага спецыяліста аддзела работы арганізацый сферы культуры ўпраўлення культуры Віцебскага абласнога выканаўчага камітэта Зоі Гукавай.

Асновай для новых беларуска-расійскіх праектаў стане Пагадненне аб супрацоўніцтве і сумеснай дзейнасці паміж Віцебскай абласной бібліятэкай імя У. І. Леніна і Прадстаўніцтвам Рассупрацоўніцтва ў Рэспубліцы Беларусь, якое падпісалі дырэктар абласной бібліятэкі Таццяна Адамян і кіраўнік Прадстаўніцтва Юрый Макушын.

Важнай падтрымкай цікавасці да сучаснай рускай літаратуры і творчага дыялогу чытачоў і літаратараў стане папаўненне фонду абласной бібліятэкі дзякуючы Асацыяцыі саюзаў пісьменнікаў і выдаўцоў Расіі. Вядучы спецыяліст праектнага офіса па арганізацыі творчых камандзіровак Хрысціна Карлава зачытала прывітанне ад Старшыні Асацыяцыі Сяргея Шаргунова і перадала кніжны дар з 300 выданняў у рамках міжнароднай дзейнасці арганізацыі.

Удзельнікі круглага стала – прадстаўнікі Віцебскага абласнога аддзялення Саюза пісьменнікаў Беларусі і Саюза пісьменнікаў Расіі – дзяліліся думкамі пра важнасць і пераемнасць традыцый узаемных публікацый беларускіх і расійскіх аўтараў, агульнасць тэм і каштоўнасцей, якія хвалююць аўтараў і чытачоў нашых краін.

Галоўны рэдактар газеты «Літаратурная Расія», член Саюза пісьменнікаў Расіі, паэт, празаік, перакладчык Уладзімір Яроменка, галоўны рэдактар часопіса «Раман-газета», празаік Юрый Казлоў і галоўны рэдактар часопіса «Масква», паэт, празаік і публіцыст Уладзіслаў Арцёмаў прыводзілі факты публікацый класікаў беларускай літаратуры Васіля Быкава, Уладзіміра Караткевіча, Іван Мележа, Івана Шамякіна, а таксама выпускаў міжкультурных нумароў часопісаў, якія ўключаюць творы сучасных беларускіх пісьменнікаў. Прыклад асабістага і творчага лёсу як маста паміж беларускай і рускай літаратурамі і культурамі прадставіў празаік, эсэіст Алесь Кажадуб.

Прадстаўнікі Віцебскага абласнога аддзялення Саюза пісьменнікаў Беларусі і Саюза пісьменнікаў Расіі абмеркавалі ідэі і перспектывы рэалізацыі ў 2025 годзе сумесных канферэнцый, семінараў, выставак, прэзентацый у сферы культуры, а таксама маладзёжных праектаў у Віцебску і ў іншых гарадах Беларусі і Расіі.

Завяршылася сустрэча на паэтычнай ноце. Свае вершы чыталі Старшыня Віцебскага абласнога аддзялення Саюза пісьменнікаў Беларусі Заслужаны дзеяч культуры Рэспублікі Беларусь Тамара Краснова-Гусачэнка, а таксама Уладзіслаў Арцёмаў, Валерый Казакоў, Васіль Калтуноў, Мікалай Намеснікаў.