X навукова-практычная канферэнцыя «Віцебскі край»

Details

Створана 26.11.2024 09:59

21–22 лістапада ў Віцебскай абласной бібліятэцы адбылася X навукова-практычная канферэнцыя «Віцебскі край», прысвечаная 1050-годдзю г. Віцебска і 80-годдзю вызвалення Беларусі ад нямецка-фашысцкіх захопнікаў.

Арганізатарамі канферэнцыі выступілі Віцебская абласная бібліятэка імя У. І. Леніна, Інстытут гісторыі Нацыянальнай акадэміі навук Беларусі, Цэнтр даследаванняў беларускай культуры, мовы і літаратуры Нацыянальнай акадэміі навук Беларусі, Віцебскі абласны краязнаўчы музей.

З прывітальным словам да ўдзельнікаў звярнуліся галоўны спецыяліст упраўлення культуры Віцебскага аблвыканкама, кандыдат гістарычных навук, дацэнт Дзяніс Юрчак, дырэктар Віцебскай абласной бібліятэкі Таццяна Адамян, вучоны сакратар Інстытута гісторыі НАН Беларусі Наталля Перавалава, першы намеснік дырэктара па навуковай рабоце Цэнтра даследаванняў беларускай культуры, мовы і літаратуры НАН Беларусі Аляксандр Бараноўскі, дырэктар Віцебскага абласнога краязнаўчага музея Таццяна Старынская, дырэктар Інстытута мовазнаўства імя Якуба Коласа Цэнтра даследаванняў беларускай культуры, мовы і літаратуры НАН Беларусі Ігар Капылоў.

На пленарным пасяджэнні канферэнцыі адбыліся прэзентацыі кніг Аляксандра Бараноўскага, Мікалая Півавара, Уладзіміра Снапкоўскага. Наталля Перавалава прэзентавала серыйнае выданне Інстытута гісторыі «Народны летапіс Вялікай Айчыннай вайны: успомнім усіх!», чацвёртая кніга якога пабачыў свет у гэтым годзе.

Граматамі і Падзякамі Інстытута гісторыі НАН Беларусі і Цэнтра даследаванняў беларускай культуры, мовы і літаратуры НАН Беларусі былі адзначаны гісторыкі і краязнаўцы – даследчыкі Віцебскага краю.

У Віцебскім абласным краязнаўчым музеі адбыўся круглы стол, прысвечаны 80-годдзю вызвалення Беларусі ад нямецка-фашысцкіх захопнікаў.

Прагучалі цікавыя даклады на секцыях «Гістарычнае краязнаўства. Віцебскі край ад старажытнасці да 1917 г.», «Гістарычнае краязнаўства. Віцебскі край з 1918 да 1941 г.», «Гістарычнае краязнаўства. Віцебскі край з 1941 г. да сучаснасці. Літаратуразнаўства», «Краязнаўства ў сістэме гуманітарных навук».

Краязнаўца з аг. Бачэйкава Ала Арлова перадала ў дар Віцебскай абласной бібліятэцы ўнікальнае выданне – «Народные русские сказки» А. Афанасьева 1863 года.

Дырэктар Музея старажытнабеларускай культуры, кандыдат мастацтвазнаўства, дацэнт Барыс Лазука прадставіў ўвазе прысутных пяць старажытнабеларускіх ікон з Віцебшчыны, што захоўваюцца ў фондах музея, і прысвяціў сваё выступленне помнікам мастацтва і матэрыяльнай культуры Віцебшчыны ў фондах Музея старажытнабеларускай культуры.

Падчас канферэнцыі адбылося адкрыццё выставы кніжных рарытэтаў з дамашняй бібліятэкі краязнаўцы Аркадзя Падліпскага «Собрание заветных книг».