Віцебск сустракае мастацтва: прэзентацыя кнігі пра Эль Лісіцкага

Details

Створана 17.10.2024 10:04

Яркая прэзентацыя кнігі доктара мастацтвазнаўства, прафесара Таццяны Катовіч, прысвечаная знакамітаму мастаку Эль Лісіцкаму, адбылася 15 кастрычніка ў абласной бібліятэцы.

Выданне «Витебск. Эль Лисицкий» стала дзявятай кнігай у серыі «Віцебскія канспекты», якая даследуе гісторыю і творчасць членаў УНОВИСа.

Таццяна Катовіч эмацыйна апісала прысутным атмасферу «супрэматычнага горада Віцебска» 1920-х гадоў. Яна расказала пра ключавыя моманты творчага шляху Лісіцкага, яго паліграфічныя праекты і ўплыў на культурнае жыццё рэгіёну. Адмысловая ўвага была нададзена стварэнню Музея гісторыі Віцебскага народнага мастацкага вучылішча, дзе размешчана падлогавае каменнае пано з вядомым плакатам Лісіцкага «Клином красным бей белых». Таццяна Віктараўна расказала аб перыядзе стварэння музея, цікавых выставах-акцыях, якія адбыліся ў апошні час.

Працягнула тэму арганізатар і куратар ІІ Міжнароднага конкурсу плаката «УНОВИС. XXI стагоддзе. #ЭЛЬ130 / #EL130» і выставы плакатаў Наталля Тарабука. Яна прадставіла гасцям незвычайную канструктыўную кнігу пераможцы конкурсу ў намінацыі «Книга#КНИГАЭЛЬ», студэнткі Віцебскага дзяржаўнага тэхналагічнага ўніверсітэта Ганны Красоцкай.

Прэзентацыя стала не толькі данінай павагі вялікаму майстру, але і важным крокам у папулярызацыі мастацтва віцебскай мастацкай школы, якая натхняе новыя пакаленні творцаў.