Адкрыццё фотавыставы «Нацыянальная бібліятэка Беларусі»

Details

Створана 15.07.2022 13:14

14 ліпеня ў бібліятэцы адбылося адкрыццё перасоўнай фотавыставы «Нацыянальная бібліятэка Беларусі».

У сваім прывітальным слове генеральны дырэктар Нацыянальнай бібліятэкі Беларусі Аксана Кніжнікава падзякавала кіраўніцтва Віцебскай абласной бібліятэкі імя У. І. Леніна за прадастаўленую магчымасць пазнаёміць жыхароў Віцебска з гісторыяй «алмаза ведаў», яго архітэктурнымі асаблівасцямі і мастацкім афармленнем.

На выставе прадстаўлены 24 работы фотамастакоў Аляксандра Жарнасека, Лолія Македонскага, Анатоля Дрыбаса, Валерыя Харчанкі, Сяргея Плыткевіча, Віктора Суглоба. Гэта ўнікальная магчымасць прагуляцца па Нацыянальнай бібліятэцы, убачыць яе вачыма фотамастакоў.

Перасоўная фотавыстава «Нацыянальная бібліятэка Беларусі» прымеркавана да 100-годдзя ўстановы і расказвае аб сучаснай Нацыянальнай бібліятэцы як аб маштабным шматфункцыянальным комплексе, у якім сумясціліся высокія тэхналогіі і лепшыя традыцыі, сучасны дызайн і безумоўны камфорт. Арыгінальны будынак выкананы ў выглядзе каштоўнага каменя, які сімвалізуе каштоўнасць ведаў, якія захоўваюцца ў бібліятэцы. Дзякуючы такому незвычайнаму архітэктурнаму рашэнню Міхаіла Вінаградава і Віктара Крамарэнкі «беларускі алмаз» не раз апынаўся ў спісах найбольш дзіўных, незвычайных збудаванняў свету.