Чыстае навакольнае асяроддзе - ключ да здаровага жыцця

Details

Створана 08.04.2022 15:30

7 красавіка ў бібліятэцы прайшла інфармацыйная гадзіна для старшакласнікаў у рамках інфармацыйна-адукацыйнага праекта «Школа Актыўнага Грамадзяніна» («ШАГ») на тэму «Гонар за Беларусь. Чыстае навакольнае асяроддзе - ключ да здаровага жыцця».

Мерапрыемства, арганізаванае ў фармаце дыялогавай пляцоўкі, падрыхтавалі і правялі для вучняў старэйшых класаў гімназіі № 1 імя Жарэса Алфёрава і сярэдняй школы № 2 г. Віцебска супрацоўнікі Віцебскага абласнога камітэта прыродных рэсурсаў і аховы навакольнага асяроддзя і Віцебскай абласной бібліятэкі.

Начальнік аддзела прававой, кадравай і арганізацыйнай работы Віцебскага абласнога камітэта прыродных рэсурсаў і аховы навакольнага асяроддзя Людміла Капранава ў сваім выступленні асвятліла актуальныя пытанні экалогіі, расказала аб праектах Міністэрства прыродных рэсурсаў і аховы навакольнага асяроддзя Рэспублікі Беларусь і дзейнасці грамадскіх эколагаў Віцебскай вобласці.

Аб дасягненнях у галіне захавання экалагічна чыстага навакольнага асяроддзя і экалагічных праблемах горада Віцебска расказаў начальнік гарадской інспекцыі прыродных рэсурсаў і аховы навакольнага асяроддзя Сяргей Лазука. Сяргей Аляксандравіч перадаў у фонд бібліятэкі двухтомнік «Чырвоная кніга Рэспублікі Беларусь».

Дырэктар Віцебскай абласной бібліятэкі Таццяна Адамян падзялілася вопытам работы бібліятэк па экалагічнай асвеце моладзі і расказала пра бібліятэчныя праекты экалагічнай накіраванасці.

Вучаніцы гімназіі № 1 г. Віцебска Паліна Сінякова і Елізавета Правіцель прэзентавалі экалагічны праект «Зялёная школа».

Супрацоўнікі бібліятэкі правялі бібліяграфічны агляд перыядычных выданняў экалагічнай тэматыкі з фонду абласной бібліятэкі і прадставілі кніжную экспазіцыю «Экалогія. Прырода. Жыццё».