Тэматычны вечар «Вехи афганской войны в истории Республики Беларусь»

Details

Створана 11.02.2022 08:13

10 лютага ў Віцебскай абласной бібліятэцы адбыўся тэматычны вечар «Вехи афганской войны в истории Республики Беларусь» у рамках Года гістарычнай памяці.

Мерапрыемства было падрыхтавана супрацоўнікамі Віцебскага дзяржаўнага музея воінаў-інтэрнацыяналістаў. На вечары прысутнічалі ўдзельнікі баявых дзеянняў у Рэспубліцы Афганістан, прадстаўнікі абласных і гарадскіх грамадскіх аб'яднанняў, супрацоўнікі музея воінаў-інтэрнацыяналістаў, педагогі, прадстаўнікі СМІ, студэнты і школьнікі.

Перад гасцямі выступілі старшыня Віцебскай абласной арганізацыі грамадскага аб'яднання «Беларускі саюз ветэранаў вайны ў Афганістане» Валяр'ян Альбінавіч Мацкевіч, воін-інтэрнацыяналіст, пісьменнік Валерый Рыгоравіч Марчанка. У вечары памяці прыняў удзел воін-афганец, кавалер ордэна Чырвонай зоркі Вячаслаў Канстанцінавіч Белаус, які падзяліўся ўспамінамі пра перыяд афганскай вайны з мая 1985 па люты 1989 гг. і выступіў перад удзельнікамі мерапрыемства з музычнымі кампазіцыямі. Падпалкоўнік ў адстаўцы Іван Аляксандравіч Навічкоў расказаў пра дзейнасць 339-га ваенна-транспартнага авіяцыйнага палка на афганскай зямлі. Педагог Віцебскага гарадскога палаца дзяцей і моладзі Галіна Новак пазнаёміла з дзейнасцю аб'яднання па інтарэсах «Краязнаўства» па ўвекавечанні памяці воінаў-інтэрнацыяналістаў – ураджэнцаў і жыхароў Віцебска. Увазе гасцей вечара была прапанавана прэзентацыя, падрыхтаваная супрацоўнікамі музея воінаў-інтэрнацыяналістаў. Галоўны захавальнік фондаў музея Вікторыя Харкевіч распавяла пра тое, як віцебскія газеты 90-х гадоў знаёмілі жыхароў горада з афганскімі падзеямі. Падчас мерапрыемства прагучалі музычныя нумары ў выкананні педагога-арганізатара Кацярыны Бяляевай і навучэнцаў віцебскай гімназіі № 3.

Глыбокі водгук у сэрцах гасцей і ўдзельнікаў вечара знайшлі словы старшыні Віцебскага абласнога Савета дэпутатаў Уладзіміра Уладзіміравіча Цярэнцьева, які закрануў актуальныя праблемы захавання і ўвекавечання памяці воінаў-інтэрнацыяналістаў і ўдзельнікаў Вялікай Айчыннай вайны і патрыятычнага выхавання падрастаючага пакалення.

Да мерапрыемства супрацоўнікамі бібліятэкі была падрыхтавана кніжная выстава, прысвечаная афганскай тэматыцы.